ЯНГИҚЎРҒОНДА ЯНГИ ЙИЛ ТАДБИРИ

Янгиқўрғонда янги йил тадбири

“Фарзандлари соғлом юрт қудратли бўлур, қудратли элнинг  фарзандлари соғлом бўлур.”

Янги йил тадбирлари барча жойларда шод-ҳуррамлик билан кутиб олинмоқда.

Наманган вилояти Янгиқўрғон туманида болажонларнинг қишки таътил кунларини мароқли ўтказиш мақсадида туман марказида улар учун ажойиб арча байрами тадбири ташкил этилди. Мана шундай эзгу ишларни амалга оширишда Наманган вилояти  касаба уюшмаларининг ҳамкорликдаги ишлари алоҳида таҳсинга сазовордир.

Туман ҳокимлиги, касаба уюшмалари тармоқ кенгашлари, туман ички ишлар бўлими, “Камолот” ЁИҲ туман Кенгаши ҳамкорлигида ташкил этилган бу байрамда 10 нафар ота-онасиз қолган болалар, 450 нафар ижтимоий ҳимояга мухтож оилалар фарзандларига янги йил совғалари тарқатилди.

Байрамда иштирок этган эртак қаҳрамонлари, шўх ўйин кулгулар, рақслар томошабин болаларни ҳайратда қолдирди.

“Ҳар йили касаба уюшмаларининг эсдалик совғаларини оламан. Мен совғалар учун эмас, биз каби болаларга давлатимиз томонидан кўрсатилаётган ғамхўрликлар учун миннатдорман. Бу эътибор мен ва қаторимдаги дўстларимнинг келажакда янада аъло ўқишга, Ватанимни севишга, буюк Ўзбекистонимиз келажаги учун хисса қўшишга ундайди.”- дейди Янгиқўрғон туманидаги 10-сонли мактаб ўқувчиси Камолиддин Матмусаев.

Юқоридаги каби тадбирлар вилоятнинг барча туманларида ҳам давом этмоқда.