ТАНТАНАЛИ КУЗАТИШ

            Наманган вилоятида жорий йилда фаолият юритадиган 8 та стационар  оромгоҳ биринчи мавсумда 1445 нафар болажонни ўз бағрига чорлади. Ўғил-қизларнинг шодлигига шодлик қўшиш мақсадида ҳар бир туман ҳокимияти олдида тантанали кузатиш маросимлари ташкил этилди. Бадиий чиқишларга бой, куй-қўшиққа кон ушбу тадбирлар олдиндаги 12 кунлик ҳордиқ онларининг дебочаси бўлди, десак, янглишмаймиз.

“Камолот” ЁИҲ туман бўлимлари, “Маҳалла” жамғармаси, таълим муассасалари билан ҳамкорликда ташкил этилган ушбу тадбирларда нуронийлар, ота-оналар, туман ҳокимлари ҳамда касаба уюшма фаоллари иштирок этишди.

Таъкидлаш ўринлики, барча оромгоҳлардаги шароит болажонлар ҳамда уларнинг ота-оналарига маъқул бўлмоқда. 12 кунлик дастур доирасида дам олувчиларнинг жисмоний чиниқишини, интеллектуал улғайишини кўзда тутувчи машғулотлар ўтказилиши назарда тутилган. Шунингдек, ҳар бир оромгоҳда китобсеварларнинг истаклари инобатга олиниб, янги алифбодаги бадиий китоблар ўқишига доимгидан-да кўпроқ эътибор қаратилган.

­- Ёшлигида оромгоҳга борган бола катта бўлганда ҳам тенгдошларидан ажралиб туради, ­- дейди шаҳар марказидаги Уч фаввора хиёбонида болаларга оқ йўл тиларкан вилоят ҳокими ўринбосари П.Маткаримов. ­ – Чунки у атрофдагилар билан мулоқот қилиш, ижтимоий ҳаётда мустақил бўлиш кўникмасига эга бўлади. Бугунги бахтиёр болаларда ҳам шундай имконият мавжуд. Барча қулайлик ва имтиёз сизлар учун экан, ундан унумли фойдаланинг!

Тантанали маросимдан сўнг жажжилар безатилган автобусларда оромгоҳлар сари йўл олишди.

Нозима ЮЛДАШЕВА,

Наманган шаҳридаги 35-мактаб ўқитувчиси

Дилдора Раҳмонова тайёрлади.