ҒОЛИБ-НАМАНГАНЛИК СПОРТЧИ ҚИЗЛАР

Маданият, спорт ва туризм ходимлари касаба уюшмаси Республика кенгаши ташаббуси билан спорт мактаблари хотин-қизлари ўртасида спортнинг мини футбол тури бўйича «Биз спортчи қизлармиз!» шиори остида ҳудудларда мусобақалар ўтказилди.
Тармоқ касаба уюшмаси тизимидаги спорт мактабларида фаолият юритаётган аёл ходимлар ўртасида соғлом турмуш тарзини тарғиб қилиш, уларни спорт билан шуғулланишга кенг жалб қилиш, спорт соғломлаштириш тадбирлари орқали аёлларнинг саломатлигини тиклашга кўмаклашиш мақсадида ташкил этилган ушбу мусобақаларнинг ҳудудий боқичларида ғолибликни қўлга киритган жамоалар Наманганда ўтказилган Республика босқичида ўзаро беллашдилар.
Наманган шаҳридаги «Баркамол.авлод» спорт мажмуасида ўтказилган мусобақаларда 25 ёшдан юқори бўлган, жамоада 3 йилдан буён меҳнат қилиб келаётган аёл ходимлар куч синашдилар.
Қизғин кечган баҳслар якунига кўра, учинчи ўринни Самарқанд ва Бухоро жамоаси вакиллари қўлган киритган бўлса, иккинчи ўрин Тошкент вилояти вакилларига насиб этди. Мусобақада мутлақ ғолибликни Наманган жамоаси эгаллади.
Мини футбол бўйича ғолиб хотин-қизлар Ўзбекистон маданият, спорт ва туризм ходимлари касаба уюшмаси Республика кенгаши маблағлари ҳисобидан махсус медаллар ҳамда ҳудудий бирлашган кенгашларининг қимматбаҳо совғалари билан тақдирланишди.
Мазкур мусобақада 12 та вилоят, Тошкент шаҳри ҳамда Қорақалпоғистон республикасининг жамоа вакиллари иштирок этишди.