Касаба уюшма туҳфаси

ЧАҚАЛОҚ ЙИҒИСИ, ЎҒИЛ-ҚИЗЛАР КУЛГУСИ ЖАРАНГЛАСИН!

Яратганнинг энг тотли тортиғи, шубҳасиз, фарзанддир. Бу неъматнинг қийматини фарзанд кўриш орзусидаги инсонлар бошқалардан кўра яхшироқ англашади. Ҳамиша, ҳар соҳада ўз аъзоларига мададкор ҳисобланган касаба уюшмалари ана шундай кишиларнинг оғирини енгил қилишга эришиб келишмоқда.

«Умид гулшани» сиҳатгоҳида мақсадли даволаниб, фарзанд кўриш қувончига эришган оилалар саноғи вилоятимизда ҳам талайгина. Уларнинг аксарияти касаба уюшмаси томонидан бепул йўлланма билан таъминланаётгани эса тизимдаги ютуқлардандир.

Наврўз айёми шукуҳи ўлкамизни файзга тўлдираётган шу кунларда яна уч оила «Умид гулшани»га йўл олди. «Халқ билан мулоқот ва инсон манфаатлари йили» Давлат дастурига асосан, Косонсой маиший хизмат касб-ҳунар коллежи ўқитувчиси Феруза Бойхонова, Мингбулоқ туманидаги 21-МТМ мудираси Гулчеҳра Болтабоева, Наманган шаҳридаги 5-мактаб ўқитувчиси Марғуба Шокирова бепул йўлланма билан таъминланишган бўлса, уларнинг турмуш ўртоқлари имтиёзли асосда сиҳатгоҳда даволанишмоқда.

– Номиданоқ қалбимизга умид чироғини ёқаётган сиҳатгоҳга яхши ниятлар билан йўл олдик, – дейди Мингбулоқ туманидаги 21-МТМ мудираси Гулчеҳра Болтабоева. – Тўққиз йилдирки, фарзанд кўриш орзусида кўплаб даргоҳлар эшигини қоқдик. Ушбу сиҳатгоҳга эзгуликни ўзининг шиори қилиб олган касаба уюшма шарофати билан йўл олар эканмиз, Яратгандан ноумид қилмаслигини сўраётирмиз. Болалар билан ишлаганим учун ҳам дунёни гўзал этгувчи чироқ улар эканлигини яхши биламан. Ниятим, ҳар бир хонадонда чақалоқ йиғиси, ўғил-қизлар кулгуси жарангласин!

Дилшодбек ТЎХТАБОЕВ,

Наманган вилоят касаба уюшма ташкилотлари Бирлашмаси

ижтимоий суғурта бўлими мудири